महात्मा फुले कृषि विद्यापीठ राबविणार कृषि पारायणाची नविन संकल्पना

राहुरी विद्यापीठ प्रतिनिधी : महात्मा फुले कृषि विद्यापीठाचे कुलगुरु डॉ. पी.जी. पाटील यांच्या संकल्पनेतून कृषि पारायण हि संकल्पना विद्यापीठाच्या कार्यक्षेत्रातील दहा जिल्ह्यात राबविली जाणार आहे. पश्चिम महाराष्ट्रातील दहा जिल्हे नंदूरबार, जळगाव, धुळे, नाशिक, अहमदनगर, पुणे, सोलापूर, सांगली, सातारा व कोल्हापूर हे महात्मा फुले कृृषि विद्यापीठाचे कार्यक्षेत्र आहे. या जिल्ह्यातील कृषि महाविद्यालये, संशोधन केंद्र, कृषि विज्ञान केंद्रे, विभागीय विस्तार केंद्रे, जिल्हा विस्तार केेंद्रे यांच्या सहभागातून हा कृषि पारायण उपक्रम राबवला जाणार आहे. यामध्ये महाराष्ट्र शासनाचे कृषि अधिकारी, पशुसंवर्धन अधिकारी यांचा सुध्दा सहभाग घेणार आहे. राज्यात प्रथमच असा तंत्रज्ञान प्रसाराचा शेतकरीभिमूख उपक्रम राबविला जाणार असल्याचे कुलगुरु डॉ. पाटील यांनी सांगितले.

राज्यातच नव्हे तर देशात कृृषि पारायण हा शेतकरीभिमूख तंत्रज्ञान प्रसाराचा कार्यक्रम  प्रथमच आम्ही राबविणार आहोत. यासाठी जिल्हानिहाय शास्त्रज्ञांचा चमू बनवून हा प्रत्येक हंगामातील एक दिवस एक गाव प्रति जिल्हा तंत्रज्ञान प्रसारासाठी घेणार आहे. अशा उपक्रमामुळे शेतकर्यांना शेती करण्याचे शास्त्रीय ज्ञान मिळेल व त्यांच्या उत्पन्नात वृध्दी होईल.

– कुलगुरु डॉ. पी.जी पाटील