उमेद अभियानांतर्गत कोंढवड येथे बँक मेळावा; मेळाव्यात एकच प्रकरण दाखल

राहुरी : कोंढवड येथील स्वयंसहाय्यता महिला समुहातील महिलांनी क्रांतीसेनेकडे तक्रारी केल्याने सोमवार दि. १० ऑक्टोबर २०२२ रोजी मुख्यमंत्री ना. एकनाथ शिंदे यांना तहसील कार्यालय मार्फत क्रांतीसेनेने अभियान बंद करण्याच्या मागणीचे निवेदन देत उमेद अभियानाबाबत आवाज उठविल्याने उमेद आधिकार्यांकडुन कोंढवड येथे एचडीएफसी बँक मेळावा आयोजित करण्यात आला होता.

या मेळाव्यासाठी संबंधित अधिकाऱ्यांकडुन बँक मेळाव्यासंदर्भात मेळाव्याच्या दिवशीच दि. १२ ऑक्टोबर २०२२ रोजी सकाळी ११ वा. ३८ मिनिटांनी उमेद समुह कोंढवड या व्हाट्सअप ग्रुपवर मेसेज पाठवुन दु. १२ वा. ३० मिनिटांनी एचडीएफसी बँक मेळावा आहे, असा मेसेज टाकण्यात आला. परंतु तोपर्यंत बहुसंख्य महिला या कामानिमित्त घरातून बाहेर पडल्यामुळे उपस्थिती फारच नगण्य होती. ज्या उपस्थित महिला होत्या त्यांना या मेळाव्याची पुर्व कल्पना नसल्याने कागदपत्रांची कुठलिही पुर्तता करता आली नाही. बँक मेळाव्यात फक्त एकाच गटाचे कर्ज प्रकरण दाखल करण्यात आले. संबंधित अधिकार्यांनी किमान मेळाव्याच्या आदल्या दिवशी गावातील अभियानाच्या जबाबदार व्यक्तीला फोन, मेसेज द्वारे उद्या गावात बँक मेळावा घेऊ, अशी कल्पना देणे गरजेचे होते. परंतु तसे न करता गावात आल्यानंतर व्हाट्सअप ग्रुपवर मेसेज टाकुन माहिती दिली. महिलांना मेळाव्याची माहिती वेळेवर न मिळाल्याने अनेक गरजवंत महिला वंचित राहून बँक मेळावा अयशस्वी झाला.

संबंधित अधिकार्यांचा बँक मेळावा अयशस्वी झाल्यानंतर त्यांनी ठराविक महिलांना बाजुला घेऊन गावातील सीआरपी बदला असा सल्ला दिला असल्याची वार्ता कानी पडल्याने दिवसभर उमेद अभियानाचे अधिकारी गावात अभियान राबविण्यासाठी आले होते का राजकारण करायला ? अशी उलटसुलट चर्चा अभियानाच्या महिला सदस्यांमध्ये रंगली होती.