कृषि पदविका अभ्यासक्रमाला नविन शैक्षणिक धोरणाशी संसुगत केल्यास उच्च शिक्षणाच्या अनेक संधी उपलब्ध होतील – डॉ. प्रशांत बोडके

राहुरी विद्यापीठ : महाराष्ट्र राज्यातील कृषि पदविका अभ्यासक्रम उत्तीर्ण विद्यार्थ्यांना कृषि शिक्षणाच्या कौशल्य विकास कार्यक्रमांतर्गत नविन शैक्षणीक धोरणाशी सन 2020 नुसार सुसंगत करुन उच्च शिक्षणाच्या अनेक संधी उपलब्ध होणार आहेत. त्यामुळे या विद्यार्थ्यांना स्वयं रोजगारातून अनेक लघुउद्योग उभारता येतील असे प्रतिपादन महाराष्ट्र राज्यातील चारही कृषि विद्यापीठांचे कृषि तंत्रज्ञान शिक्षण विभागाचे सहयोगी अधिष्ठाता राज्यस्तरीय समितीचे अध्यक्ष डॉ. प्रशांत बोडके यांनी केले.

महात्मा फुले कृषि विद्यापीठ, राहुरी येथे राज्यस्तरीय सहयोगी अधिष्ठाता (कृषि तंत्रज्ञान शिक्षण) समन्वय समितीची दोन दिवसीय बैठकीचे आयोजन करण्यात आले आहे. यावेळी या बैठकीच्या अध्यक्षस्थानावरुन डॉ. प्रशांत बोडके बोलत होते. यावेळी या कार्यक्रमाच्या उद्घाटनप्रसंगी प्रमुख उपस्थितीमध्ये महात्मा फुले कृषि विद्यापीठाचे कुलसचिव डॉ. नितीन दानवले होते. याप्रसंगी कृषि अभियांत्रिकी महाविद्यालयाचे सहयोगी अधिष्ठाता डॉ. रविंद्र बनसोड, परभणी येथील वसंतराव नाईक मराठवाडा कृषि विद्यापीठाचे सहयोगी अधिष्ठाता डॉ. जी.के. लोंढे, दापोली येथील डॉ. बाळासाहेब सावंत कोकण कृषि विद्यापीठाचे सहयोगी अधिष्ठाता डॉ. आर.टी. ठोकळ, अकोला येथील डॉ. पंजाबराव देशमुख कृषि विद्यापीठाचे सहयोगी अधिष्ठाता डॉ. आर.एन. काटकर व बारामती येथील कृषि तंत्र निकेतनचे प्राचार्य डॉ. रासकर उपस्थित होते.

यावेळी डॉ. नितीन दानवले आपल्या मार्गदर्शनात म्हणाले की कृषि पदविकेच्या शिक्षणाला कौशल्य आधारीत शेतीपूरक व्यवसायिक अभ्यासक्रमाची जोड द्यायला हवी. यामुळे या विद्यार्थ्यांना नोकरी तसेच स्वतःचा उद्योग निर्माण करण्याच्या अनेक संधी निर्माण होतील. डॉ. रविंद्र बनसोड आपल्या मार्गदर्शनात म्हणाले की कृषि पदविकेच्या अभ्यासक्रमामध्ये कृत्रिम बुध्दीमत्ता, रोबोट तंत्रज्ञान तसेच ड्रोन तंत्रज्ञान या विषयीचा आंतर्भाव होणे गरजेचे असून यामुळे या विद्यार्थ्यांना विविध राष्ट्रीय स्तरावरील कंपन्यांमध्ये नोकरीच्या संधी निर्माण होतील.

महाराष्ट्र राज्यातील चारही कृषि विद्यापीठात सुरु असलेले माळी प्रशिक्षण, कृषि तंत्र पदवीका व कृषि तंत्र निकेतन अभ्यासक्रमाच्या अनुषंगाने भारत सरकारच्या नविन शैक्षणिक धोरणानुसार इयत्ता 10 उत्तीर्ण विद्यार्थ्यांसाठी उच्च शिक्षणाच्या व स्वयं रोजगाराच्या नवनविन कौशल्य विकास आभ्यासक्रमासह नाविन्यपूर्ण संधी उपलब्ध होण्यासाठी सदरच्या तीनही अभ्यासक्रमात बदल करण्यासाठी दोन दिवसीय बैठकीचे आयोजन करण्यात आले आहे.

या कार्यक्रमाचे सूत्रसंचालन हेमचंद्र परदेशी यांनी तर आभार पुणतांबा कृषि तंत्र विद्यालयाचे प्राचार्य डॉ. पंडित खर्डे यांनी केले. या कार्यक्रमासाठी विद्यापीठातील विभाग प्रमुख, चारही विद्यापीठांचे तांत्रिक अधिकारी उपस्थित होते. या कार्यक्रमाच्या यशस्वीतेसाठी अशोक हारदे, सौ. छाया पालवे, दत्तात्रय राजे यांनी परिश्रम घेतले.