राहुरी विद्यापीठ : महात्मा फुले कृषी विद्यापीठाचे संशोधन संचालक डॉ. सुनिल गोरंटीवार यांनी मध्यवर्ती ऊस संशोधन केंद्र, पाडेगाव येथे भेट दिली. यावेळी मध्यवर्ती ऊस संशोधन केंद्राचे ऊस विशेषज्ञ डॉ.राजेंद्र भिलारे यांनी त्यांचे स्वागत केले व ऊस संशोधन केंद्राच्या स्थापनेपासून ते आजपर्यंत या संशोधन केंद्राने प्रसारीत केलेल्या 16 वाणांची माहिती देवून या वाणाचे देशासाठी आणि राज्यासाठी असलेले योगदान विषद केले.
डॉ. उबाळे यांनी प्रक्षेत्रावरील प्रात्यक्षिक प्लॉटमध्ये घेण्यात आलेल्या विविध वाणांच्या विषयी माहिती दिली. यावेळी डॉ. सुनिल गोरंटीवार यांनी या केंद्राला देशपातळीवरील सर्वोत्कृष्ठ संशोधन केंद्र पुरस्कार तसेच सन 2022 या वर्षीचा विद्यापीठ स्तरीय उत्कृष्ठ संशोधन केंद्र पुरस्कार मिळाल्याबद्दल ऊस विशेषज्ञ, शास्त्रज्ञ, अधिकारी व कर्मचारी यांचे अभिनंदन केले. तसेच संशोधन केंद्राचे उत्पन्न वाढविणे व महाराष्ट्रातील शेतकर्यांसाठी आडसाली हंगामासाठी मुलभूत ऊस बियाणे पुरवठा करण्याकरीता संशोधन केंद्रातील प्रक्षेत्रावरील मुख्य रस्त्याचे डांबरीकरण किंवा खडीकरण करणे गरजेचे आहे असे त्यांनी नमूद केले.
ऊस पिकाचे अधिकाधिक उत्पादन घेण्यासाठी आधुनिक ऊस उत्पादन तंत्रज्ञानाविषयी ऊस विशेषज्ञ डॉ. राजेंद्र भिलारे, मृदशास्त्र विभागातील डॉ. सुभाष घोडके, ऊस किटक शास्त्रज्ञ प्रा. शालीग्राम गांगुर्डे, ऊस शरीरक्रिया शास्त्रज्ञ डॉ. कैलास भोईटे, वरीष्ठ संशोधन सहाय्यक डॉ. सुरेश उबाळे, कनिष्ठ संशोधन सहाय्यक श्रीमती डॉ. माधवी शेळके यांचेबरोबर त्यांनी संवाद साधला. या कार्यक्रमाचे वेळी डॉ. किरणकुमार ओंबासे, डॉ. दत्तात्रय थोरवे, डॉ. रणजितसिंह निंबाळकर व इतर सर्व कर्मचारी वर्ग उपस्थित होते.
या भेटीच्या वेळी संशोधन केंद्रावर घेण्यात आलेल्या प्रयोगांना, ऊस बेणे मळ्यास तसेच या संशोधन केंद्राने विकसित केलेल्या नवीन वाणांच्या प्लॉटला डॉ.गोरंटीवार यांनी भेट दिली. या कार्यक्रमाचे सुत्रसंचालन आणि आभार प्रदर्शन डॉ. सुरेश उबाळे यांनी केले.
