गोटुंबे आखाडा येथील जिल्हा परिषद प्राथमिक शाळेत भरला आनंदी बाजार
विद्यार्थी बनले विक्रेते तर पालक व शिक्षक बनले ग्राहक

राहुरी – तालुक्यातील गोटुंबे आखाडा येथील जिल्हा परिषद प्राथमिक शाळेमध्ये स्वस्त आणि मस्त आनंदी बाजार या उपक्रमाचे आयोजन गुरुवार, दि. 9 जानेवारी रोजी करण्यात आले. या आनंदी बाजाराचे उद्घाटन शाळेच्या मुख्याध्यापिका श्रीमती जपकर मॅडम यांच्या हस्ते करण्यात आले.
या उपक्रमाचा उद्देश विद्यार्थ्यांना शालेय स्तरावर व्यावहारिक ज्ञान मिळावे, नफा-तोटा यासारख्या संकल्पना स्पष्ट व्हाव्यात, तसेच स्वकमाई व स्वयंरोजगार याची जाणीव व्हावी आणि श्रमाचे महत्त्व बालपणातच विद्यार्थ्यांपर्यंत पोहोचावे हा होता. या उपक्रमात शाळेतील बहुतांश विद्यार्थ्यांनी उत्साहाने सहभाग घेतला.
आनंदी बाजारात विविध प्रकारच्या पालेभाज्या, फळभाज्या, तसेच विविध खाद्यपदार्थ विक्रीस ठेवण्यात आले होते. या वस्तू खरेदी करण्यासाठी पालक, ग्रामस्थ आणि महिला भगिनींनी मोठ्या प्रमाणात गर्दी केली. आपल्या वस्तू विकल्या गेल्याचा आनंद विद्यार्थ्यांच्या चेहऱ्यावर स्पष्टपणे दिसत होता, अशी माहिती श्रीमती मोरे मॅडम यांनी दिली.
या उपक्रमाला गोटुंबे आखाडा येथील नागरिकांनी उत्तम प्रतिसाद दिला आणि विद्यार्थ्यांचा आनंद द्विगुणित केला. हा उपक्रम यशस्वी करण्यासाठी शाळेच्या मुख्याध्यापिका जपकर मॅडम, तसेच कल्हापुरे मॅडम, निमसे मॅडम, कमळापूर मॅडम, मोरे मॅडम, साळवे मॅडम, कांबळे मॅडम आणि दुधाडे मॅडम यांनी अथक परिश्रम घेतले.