श्रीरामपूर | बाबासाहेब चेडे : देशात प्रख्यात असलेली श्रीरामपूर तालुक्यातील संत तेरेजा चर्च हरेगाव येथील मतमाउलीच्या ७६ व्या यात्रा महोत्सवाचा शुभारंभ दि. ४ सप्टेंबर रोजी नाशिक धर्मप्रांत सेवानिवृत्त महागुरूस्वामी लूरडस डानियल यांच्या शुभ हस्ते ध्वजारोहणाने संपन्न झाला.
या प्रसंगी हरेगावातून मतमाउली मूर्तीची रथातून महागुरू स्वामी लूरडस डानियल व प्रमुख धर्मगुरू डॉमनिक रोझारिओ समवेत भव्य मिरवणूक काढण्यात आली. रथाचे सर्वत्र पूजन व स्वागत करण्यात आले. त्यानंतर डोंगरासमोर महागुरु स्वामी यांनी पवित्र मिस्सा प्रसंगी पवित्र मरिया यांच्या जीवनाबद्दल महिमा वर्णन केला. त्यावेळी फा.डॉमनिक रोझारिओ, फा.फ्रान्सिस ओहोळ, फा. संतान रॉड्रीग्ज सहभागी होते. यापूर्वी ६ जुलै पासून दर शनिवारी असे नऊ शनिवार नोव्हेना भक्ती झाली.
आज दि. ५ सप्टेंबर पासून यात्रेपर्यंत रोज सायंकाळी नोव्हेना होईल. ५ सप्टेंबर रोजी देवाच्या योजनेतील तारण दायीत्वाची माता या विषयावर रा रे डॉ बिशप अम्ब्रोस रिबेलो यांचे प्रवचन होणार आहे. दि. ६ रोजी फा. आनंद गायकवाड-दिनाच्या कैवारिणी पवित्र मारिया, दि. ७ फा.पराकाष भालेराव- धन्य माता पवित्र मरिया, बिशप रा रे डॉ बर्नाड लांसी पिंटो-आई मारिया देवाची देणगी, दि. ९ फा अजय डीमोंटे-पवित्र मरीयेचा निष्कलक गर्भ संभव, दि. १० फा. अक्षय आढाव- कृपादायीनी पवित्र मरिया, दि.११ फा.संजय पारखे- दु:खितांच्या सांत्वना पवित्र मारिया, दि. १२ फा इग्नेशियस क्षीरसागर-जगत जननी पवित्र मारिया, दि. १३ सप्टेंबर रोजी फा. प्रमोद मकासरे-पवित्र मारिया स्वर्गाचा दरवाजा या विषयावर प्रवचन करतील.
शनिवार दि. १४ सप्टेंबर रोजी मतमाउली यात्रा ७६ वा. महोत्सव साजरा होईल. त्यावेळी सकाळी ८.३० वा. पवित्र जपमाळ, नोव्हेना व विधिवत प.मारिया मूर्तीच्या शिरावर मुकुट चढविला जाईल व दर्शन रांगेने प्रारंभ होईल. सायंकाळी ४.३० वाजता महागुरु स्वामी रा रे डॉ बार्थोल बरेटो यांचे मुख्य प्रवचन होईल. यात्रा सांगता प्रसंगी दि १५ सप्टेंबर रोजी सकाळी ७.३० वा.रेक्टर पुणे फा.भाऊसाहेब संसारे यांचे प्रवचन होईल. सर्व कार्यक्रमास भाविकांनी सहभागी व्हावे असे आवाहन प्रमुख धर्मगुरू डॉमनिक रोझारिओ व सहकारी धर्मगुरू यांनी केले आहे.
