राज्यमंत्री तनपुरे यांच्या हस्ते सडे गावातील १ कोटी ४५ लाख रूपयांचे विविध विकास कामांचे लोकार्पण सोहळा संपन्न

यावेळी बोलताना ना. तनपुरे म्हणाले की, आमदार झाल्यापासून तालुक्यातील बहुतेक गावांसाठी आमदार निधी उपलब्ध करून दिला असून ज्या गावांना अजून निधी मिळाला नाही त्यांनाही निधी उपलब्ध करून दिला जाईल. बारागाव नांदूर गटातील बहुतेक गावांना निधी दिला आहे. कोरोना मुळे शासनाकडून निधी मिळण्यावर बंधने होती. पक्षाचे अध्यक्ष शरद पवार यांच्या सूचनेवरून राज्यातील आदिवासी मतदार संघाचा अभ्यास दौरा केला. आदिवासी जनतेसाठी शासनाच्या विविध योजना असून त्याबाबत मार्गदर्शन केले. जातींचे दाखले घरपोच करण्याच्या दृष्टीने तेथील प्रशासनास सूचना दिल्या. आदिवासीसाठी घरकुल बांधण्यास जर जमीन नसेल तर शासनाची ग्रामपंचायतीची गायरान जमीन त्यासाठी उपलब्ध करून तिथे घरकुल उभारले जाईल.

महात्मा फुले कृषी विद्यापीठ प्रकल्प ग्रस्तांच्या प्रश्ना बाबत पक्षाध्यक्ष शरद पवार हे कृषिमंत्री दादा भुसे यांच्याशी चर्चा करून रिक्त जागा भरण्या बाबत लवकरच मुख्यमंत्री, उपमुख्यमंत्री, कृषी मंत्री यांची बैठक घेऊन निर्णय घेणार असल्याचे सांगितले. राज्यात सत्तेवर आलेले महाविकास आघाडी सरकार सत्तेवर येण्यास युवकांचे मोठे योगदान असून त्याचे प्रश्न सोडविण्याची जबाबदारी सरकारची आहे. अनेक वर्षांपासून प्रलंबीत असलेला महावितरणच्या विद्युत सहाय्यक भरतीचा प्रश्न मार्गी लागला असून एक हजार जणांचा प्रश्न सुटला असून उर्वरित भरती बाबत प्रयत्न सुरु असल्याचे ना. तनपुरे यांनी सांगितले.